रास्वपा सभापति लामिछानेले अदालतमा बुझाए आफ्नो भागको बिगोको बैंक जमानत

भैरहवा– सुप्रिम सहकारी ठगीको मुद्दामा रुपन्देहीको कारागारमा थुनामा रहेका राष्ट्रिय स्वतन्त्र पार्टी ९रास्वपा० का सभापति तथा पूर्व गृहमन्त्री रवि लामिछानेले आफ्नो भागको बिगो तिर्न बैंक जमानत जिल्ला अदालत रुपन्देहीमा बुझाएका छन् ।

तीन दिनअघि थुनाबाहिर राख्न माग गर्दै निवेदन दिएका लामिछानेले अदालतमा २ करोड ७४ लाख ८४ हजार रुपैयाँ बराबरको बैंक जमानत पेश गरेका छन् ।

लामिछानेले थुनाबाट रिहा हुन मुलुकी फौजदारी कार्यविधि, २०७४ को दफा ६८ अनुसार बैंक जमानत लिएर अदालतबाट रिहा गर्ने आदेशको माग गरिरहेका छन् । दफा ६८ मा धरौटी वा बैंक जमानत लिएर रिहा गर्न सकिने व्यवस्था छ भने दफा ७१ मा थुनामा राख्ने वा रिहा गर्ने दायराको व्यवस्था गरिएको छ ।

लामिछानेले आफू निर्दोष भए तापनि सहकारी पीडितका लागि आफ्नो हिस्साको बिगो तिर्न तयार रहेको बताएका छन् । उनको निवेदन दर्ता भएसँगै इजलासले विपक्षीलाई जानकारी दिन आदेश दिएको छ । यद्यपि हाल पेसी स्थगित छ ।

यो मुद्दामा लामिछानेमाथि १० करोड ९९ लाख रुपैयाँ बिगो कायम गरिएको छ, जसमा आफ्नो भाग बराबरको रकम उनले बैंक जमानत राखेका छन् ।

पहिले जिल्ला अदालतले उनलाई एक करोड धरौटीमा रिहा गर्ने आदेश दिएको थियो तर उच्च अदालतले उक्त आदेश बदर गर्दै उनलाई थुनामा राख्ने आदेश दिएको थियो । लामिछानेले सर्वोच्च अदालतमा पनि निवेदन दिएका थिए, तर सर्वोच्चले पनि थुनामा राख्ने आदेश दियो ।