एनआरएनए जापानको अध्यक्षमा सिद्धार्थ श्रेष्ठको उम्मेदवारी, जुलाई १२ मा घोषणा सभा !

टोकियो, जापान — गैरआवासीय नेपाली संघ (एनआरएनए) जापानमा आगामी कार्यकाल (२०२५–२०२७) का लागि अध्यक्ष पदमा समाजसेवी सिद्धार्थ श्रेष्ठले आफ्नो उम्मेदवारी घोषणा गर्ने भएका छन्।

उनले यही जुलाई १२ (शनिबार) का दिन टोकियोको Solmari Hall, Shin-Okubo मा उम्मेदवारी घोषणा सभा आयोजना गर्न लागेका छन्। श्रेष्ठ विगत १७ वर्षदेखि जापानमा बसोबास गर्दै सामाजिक सेवामा क्रियाशील रहँदै आएका छन्।

एनआरएनए जापानमा मानार्थ सदस्यदेखि सल्लाहकार, प्रवक्ता, महासचिव हुँदै हाल उपाध्यक्षको जिम्मेवारी वहन गरिरहेका श्रेष्ठले पारदर्शी, उत्तरदायी र समावेशी नेतृत्वद्वारा संस्थालाई अघि बढाउने अठोट व्यक्त गरेका छन्। उनी भन्छन्, “संस्थालाई स्वच्छ र उत्तरदायी बनाउने मेरो प्रयास निरन्तर रहँदै आएको छ।

म कुनै प्रतिस्पर्धामा छु भन्ने हैन, निर्वाचन भनेको एक सुन्दर लोकतान्त्रिक अभ्यास हो, र म समुदायको हितमा अझ प्रभावकारी रूपमा योगदान दिन अध्यक्षको भूमिकामा उभिन लागेको हुँ।” श्रेष्ठको नारा — “नेपालीका दुःखमा पहिलो सहारा!” — ले उनको अभियानको मूल भाव प्रतिबिम्बित गर्छ। जापानमा रहेका नेपालीहरूका समस्यामा सधैं अग्रसर हुने प्रतिबद्धता उनले व्यक्त गरेका छन्।

नेपालमा रहँदा विभिन्न जिल्लादेखि राष्ट्रियस्तरसम्मका तेक्वान्डो प्रतियोगिताहरूमा सहभागी भइसकेका श्रेष्ठले नेतृत्व र समर्पणको मूल्य खेलकुदबाट सिकेको बताउँछन्। यही नेतृत्व भावना लिएर जापानमा समेत विभिन्न सामाजिक अभियानहरूमा उनी अग्रपङ्क्तिमा रहँदै आएका छन्।

उम्मेदवारी घोषणा सभा विवरण:

मिति: २०२५ जुलाई १२ (शनिबार)

समय: दिउँसो ४:०० बजे

स्थान: Solmari Hall, Shin-Okubo, Tokyo

एनआरएनए जापानमा हाल अधिवेशनको सरगर्मी बढ्दै जाँदा श्रेष्ठको उम्मेदवारीले निर्वाचनलाई थप चासोको विषय बनाएको छ। पारदर्शिता, जवाफदेहिता र सामूहिक हितमा आधारित नेतृत्वको आशामा श्रेष्ठले समर्थनको अपिल समेत गरेका छन्।