0
Shares
लन्डन — एभरटनले आफ्नो नयाँ घरेलु मैदान हिल डिकिन्सनमा आइतबार विजयी सुरुवात लिएको छ र यसका लागि उसले ब्राइटनलाई २–० ले हराएको हो । ऐतिहासिक गुडिसन पार्कलाई बिदाइ गर्दै यसै सिजनबाट एभरटनले नयाँ रंगशालामा खेल्न थालेको हो ।
त्यसै मैदानमा भएको इंग्लिस प्रिमियर लिगको पहिलो खेलमा इलिमन एनडीएले २३ औं मिनेटमा गोलको खाता खोले । त्यसपछि जेम्सन गार्नरले ५२ औं मिनेटमा दोस्रो गोल थपे । म्यानचेस्टर सिटीबाट ‘लोन’ मा आएका ज्याक गिरिलिसले दुवै गोलमा पास उपलब्ध गराए । लिगमा सिजनको पहिलो जितपछि एभर्टनको तीन अंक भएको छ र आठौं स्थानमा रह्यो । ब्राइटन एकै अंकमा सीमित रहेर १७ औं स्थानमा छ ।
क्रिस्टल प्यालेस र नटिङ्घम फरेस्टबीचको खेल १–१ को बराबरीमा टुंगिएको छ । यस खेललाई फरेस्टका प्रशिक्षक नुनो इस्प्रिटो सान्टुको अन्तिम खेल मानिएको छ । पछिल्लो समय क्लब व्यवस्थापनसँग उनको मतभेद रहेको छ, त्यसैले उनलाई क्लब जिम्मेवारीबाट हटाउन सक्ने सम्भावना छ । प्यालेसले ३७ औं मिनेटमा इस्माइल सारको गोलले अग्रता लिएको थियो । फरेस्टका लागि कलम हडसन–ओडोईले ५७ औं मिनेटमा बराबरी गोल फर्काए । प्यालेसको लगातार दुई बराबरीले दुई अंक भएको छ । फरेस्ट भने चार अंकसहित चौथो स्थानमा रह्यो ।
आर्सनलले शनिबार लिड्स युनाइटेडलाई ५–० ले पराजित गर्दै अंक तालिकाको शीर्षमा उक्लेको थियो । आर्सनल र उसको उत्तरी लन्डन प्रतिद्वन्द्वी टोटनहमको पनि समान छ अंक छ । आर्सनल गोल अन्तरले अगाडि रहेको हो । इमिरेट्समा भएको खेलमा भिक्टर योकेरेस र जरेन टिम्बरले दुई–दुई गोल गरे । अर्को गोल बुकायो साकाले गरे ।
डे ब्रुएनाको ‘डेब्यु’ मै गोल
मिलान– डिफेन्डिङ च्याम्पियन नेपोलीले इटालीको सिरी ए मा शनिबार विजयी सुरुवात लिएको छ । केभिन डे ब्रुएनाले डेब्युमै गोल गरेपछि उसले ससुलोलाई २–० ले हरायो । सुरुमा स्कट म्याकटोमिनीले गोल गरेपछि म्यानचेस्टर सिटी छाडेर इटाली आएका डे ब्रुएनाले गोल गरेका हुन् । इंग्ल्यान्डमा एक दशक लामो समय खेलेर उनी इटाली आएका हुन् । शनिबारकै अर्को खेलमा एसी मिलान झने त्रेमोन्सको हातबाट २–१ ले स्तब्धपूर्ण हार बेहोर्न बाध्य रह्यो । एस रोमाले भने बोलोग्नालाई १–० ले हरायो ।
बार्सिलोनाको लगातार दोस्रो जित
म्याड्रिड– बार्सिलोनाले स्पेनी ला लिगामा शनिबार लगातार दोस्रो जित निकालेको छ र सुरुवाती दुई खेलबाट ६ अंक बटुलेको छ । उसले दुई गोलले पछाडि रहेको स्थितिबाट लेभान्टेलाई ३–२ ले हराएको हो । लेभान्टेले इभान रोमेरो र जोसे लुइसको गोलले अग्रता लिएको थियो । त्यसपछि पेड्री तथा फेरान टोरेसले बार्सिलोनाका लागि गोल गरे ।
निर्णायक गोल भने आत्मघाती रह्यो । यो लेभान्टेका उनाई इगेगाबालका नाममा रह्यो । शनिबारका अन्य खेलमा एटलेटिको म्याड्रिड इल्चे र मार्लोकाले सेल्टा भिगोसँग समान १–१ को बराबरी खेले । रियल बेटिसले भने डेपोर्टिभो एलाभेसलाई १–० ले हरायो ।
