सोमपालले पाँच विकेट लिएपछि नेपालले मेलबर्न रेनगेड्सलाई ३३ रनले हरायो

नेपालले टस जिती ब्याटिङ गरेको नेपालले निर्धारित ओभरमा नौ विकेट गुमाएर एक सय ३९ रन बनाएको थियो । जवाफी ब्याटिङमा ओर्लिएको मेलबर्न रेनगेड्सले भने निर्धारित ओभरमा सबै विकेट गुमाएर एक सय ६ रनमात्र बनाउन सक्यो ।

मेलबर्न रेनगेड्सलाई लक्ष्यसम्म पुग्न नदिन नेपाली टोलीका बलर सोमपाल कामी एक्लैले पाँच विकेट लिए । उनले चार ओभरमा केवल १५ रन खर्चिए । उनले अन्तिम ओभरमा दुई विकेट लिए । कुशल भुर्तेलले पनि दुई विकेट कुम्ल्याए । साहब आलम र रुपेश सिंहले पनि एक–एक विकेट हात पारे ।

मेलबर्न रेनगेड्सका लागि अर्जुन नायरले सर्वाधिक २६ रन बनाए । जय लेमिरले १८, ओपनर ह्यारी डिक्सनले १६ र ओली पिकले १४ रन बटुले । नेपाली टोलीका बलरले किफायती बलिङ गर्दै अतिरिक्त रूपमा केवल ६ रन खर्चिए ।

त्यसअघि, पहिले ब्याटिङ गरेको नेपालले पारीको सन्तोषजनक शुरूआत गर्न सकेको थिएन । नेपाली टोलीका कप्तान रोहित पौडेलसँगै नियमित ओपनर आसिफ शेख, प्रभावशाली लेग–स्पिनर सन्दीप लामिछानेलगायतका खेलाडी मेलबर्न रेनगेड्स एकेडेमीविरुद्धको खेलमा मैदानमा ओर्लिएका थिएनन् ।

ओपनर कुशल भुर्तेल एक रन बनाउँदै पेभेलियन फर्किए । अर्का ओपनर भीम सार्की पनि १७ रनभन्दा अगाडि बढ्न सकेनन् । तेस्रो नम्बरमा क्रिज सम्हाल्न आएका आरिफ शेख पनि १२ रनमै आउट हुँदै पेभेलियन फर्किए ।

टोलीको कुल स्कोर ३२ रन पुग्नुअघि नै नेपालले तीन प्रभावशाली विकेट गुमाइसकेको थियो । चौथो नम्बरमा क्रिज समाल्न आएका कुशल मल्लले २९ रनको योगदान गरे । कुशल मल्लले २२ बलको सामना गरी एक छक्का र एक चौका हिर्काए ।

अनुभवी खेलाडी दीपेन्द्रसिंह ऐरीले २७ रन जोडे । उनले २८ बलको सामना गरी दुई चौका हिर्काए । चौथो विकेट गुमाउँदा नेपाली टोलीले ८० रन बनाएको थियो । गुलसन झा दुई र सोमपाल कामी शून्य रनमै आउट भए ।

लोकेश बमले २४ रनको योगदान गरे । प्रारम्भदेखि नै आक्रामक रूपमा प्रस्तुत भएका लोकेशले १६ बलमा दुई छक्का र एक चौका पनि हिर्काएका थिए । उनले चारवटै बाउन्ड्री एउटै ओभरमा प्रहार गरेका हुन् ।

नन्दन यादव एक रन बनाउँदै आउट भए । रूपेश सिंहले अविजित १६ रन बनाए । उनले २१ बलमा दुई चौका प्रहार गरे । साहब आलम शून्य रनमा आउट भए ।

मेलबर्न रेनगेड्स एकेडेमीका बलर फर्गस ओ’निल, कलुम स्ट, लचलन ब्याङ्स र माइकल आर्चरले दुई–दुई विकेट लिए । नेपाली टोलीले अतिरिक्त रूपमा १० रन पायो ।

जारी प्रतियोगितामा नेपाली टोलीले हात पारेको यो दोस्रो जीत हो । यसअघि, आफ्नो चौथो खेलमा नेपाली टोलीले होबर्ट हरिकन्स एकेडेमीलाई ६६ रनको फराकिलो अन्तरले हराएको थियो । नेपाली टोली तीन खेलमा भने पराजित भएको थियो ।

नेपाल पहिलो खेलमा एनटी स्ट्राइकसँग ४२ रनले पराजित भएको थियो । दोस्रो खेलमा नेपाली टोली बंगलादेशको ‘ए’ टोलीसँग ३२ रनले हारेको थियो । तेस्रो खेलमा नेपाली टोली मेलबर्न स्टार्स एकेडेमीसँग ३१ रनले पराजित भएको थियो ।

टप इन्ड सिरिज अगस्त २४ तारिखसम्म सञ्चालन हुनेछ । जारी शृंखलामा नेपालले आफ्नो छैटौँ तथा अन्तिम खेल शुक्रबार पाकिस्तानको ‘ए’ टोलीसँग खेल्नेछ । यो शृंखला सकिएलगत्तै नेपाली टोली अस्ट्रेलियामै अर्को शृंखलामा सहभागी हुनेछ ।

दोस्रो शृंखलामा पनि नेपाली टोलीले कुल पाँच खेल खेल्नेछ । दोस्रो शृंखलामा नेपाली टोलीले क्रिकेट एसीटीसँग अगस्ट २६ तारिखमा पहिलो खेल खेल्नेछ । सोही दिन नेपाली टोलीले आफ्नो दोस्रो खेल पनि क्रिकेट एसीटीसँगै खेल्नेछ ।

अगस्त २८ तारिखमा नेपाली टोलीले साउथ अस्ट्रेलियासँग तेस्रो खेल खेल्नेछ । सोही दिन नेपालले आफ्नो चौथो खेल पनि साउथ अस्ट्रेलियासँगै खेल्नेछ । नेपालले आफ्नो पाँचौं खेल ३० तारिखमा साउथ अस्ट्रेलियासँगै खेल्नेछ ।

नेपाली टोलीले यी दुबै शृंखला आगामी टी–२० विश्वकपको छनोट प्रतियोगिताको तयारीका क्रममा खेल्न लागेको हो । एसिया तथा प्रशान्त क्षेत्रको अन्तिम चरणको विश्वकप छनोट प्रतियोगिता आगामी अक्टोबर ८ देखि १७ तारिखसम्म ओमानमा आयोजना हुँदैछ ।

छनोट प्रतियोगितामा नेपालसहित नौ टोली सहभागी हुनेछन् । नेपाल, जापान र कुवेत प्रतियोगिताको समूह ‘बी’ मा छन् । मलेसिया, कतार र संयुक्त अरब इमिरेट्स (यूएई) समूह ‘ए’ मा छन् । समूह ‘सी’ मा भने आयोजक ओमान, पपुवा न्यू गिनी र समाओ रहेका छन् ।

अन्तिम चरणको उक्त छनोट प्रतियोगिताबाट तीनवटा टोली आगामी आईसीसी टी–२० विश्वकपमा पुग्नेछन् । आगामी टी–२० विश्वकप सन् २०२६ को फेब्रुअरी–मार्चमा भारत र श्रीलंकामा संयुक्त रूपमा आयोजना हुँदैछ ।